MSCW chairperson ruat hnukkir tura MSU ngenna la hlawhtling lo

by News Editor

Tualchhung News

ZORAM TODAY| Aizawl 26th May, 2024 (Sun): Mizo Students’ Union (MSU) Gen. Hqrs hruaitute chuan april 18, 2024 khan press conference neiin Social Welfare, Tribal Affairs, Women & Child Development department in march 8, 2024 a Mizoram State Commission for Women chairperson a an ruat AMC Ward III a ZPM councillor nilai C. Lalchhandami chu danin kum bithliah chin a siam a tlin tawh avangin sorkarin appointment a pek tawh hnukkir turin an lo ngen tawh a, sorkar aṭangin hmalakna mumal an la dawng lo niin MSU hruaitute chuan zawhna chhangin Zoram Today palai an hrilh.

MSU hruaitute chuan naktuk may 27, 2024 thawhṭan hian an hmalakna bawhzui nan a changtu leh ruattu minister Lalrinpuii hmuh an tum thu an sawi a, an dinna chu a ngai a la nih reng thu an tarlang bawk.

MSU hian RTI Act hmanga zawhna chhanna an tarlan ah MSCW chairperson a an ruat C. Lalchhandami hi 2016 march 31 khan sorkar aṭangin a pension a, chairpersona ruat anih aṭanga kum 3 chhung emaw kum 65 a tlin hma, khawi emaw zawk zawk chhung office hna a chelh thei ang, tih chu a ruattu sorkarin a bawhchhia nia an hriat thu an lo tarlang tawh a ni.